අපි හැමදාමත් ඔබට ඔබේ දරැවා පිළිබදව ඔබ දැනුවත් විය යුතු දේවල් රැගෙන එනවා වගේ අදත් ඔබට වැදගත් වන දෙයක් රැගෙන ආවා. අද අපි ඔබව දැනුවත් කරන්න බලාපොරොත්තුවෙන්නෙ මව්කුස තුළ වැඩෙන දරැවා සම්බන්ධයෙන් ඔබ දැනුවත් විය යුත්තෙ කුමක්ද යන්නයි.
දැන් ඔබ ගැබ් ගෙන ඇති බවට සුභ ආරන්චිය ලැබිලා තියෙන්නෙ. දැන් තියන ලොකුම ප්‍රෂ්නය තමයි කොහොමද කුස රැක ගන්නෙ? මාස නවයක් යනකල් කියලා . ඔබ අඩිය තියෙන්නෙ බොහොම හිමින් . ඔබ කෑම ටිකක් කන්නෙ හරි හිමින් . මම මෙහෙම ගමනක් යන්න ඉන්නෙ ගියාට කමක් නැද්ද? ඒ වගේ කාරනා ගැන ඔයාට ප්‍රෂ්න බොහෝමයක් ඇති කියලා අපි හිතනවා. ඒ විතරක් නෙවෙයි ගර්භණී මුල් මාස තුන ගැන ඔබ දැන ගත යුතු සියළුම දේවල් අද අපි දැනුවත් කරන්න බලාපොරොත්තු වෙනවා.
කෑම ගැන කතා කොලොත් ඔබට වෙනදට කන්න බොන්න ඇලජි නැති ඔබට කන්න පුළුවන් ඔබ කැමති ඕනෑම දෙයක් මේ කාලෙ කන්න බොන්න පුළුවන්. හැබැයි ගැටලුව තියෙන්නෙ මේ කාලෙ ඔබට කන්න බොන්න බෑ වමනය යනවා. අප්පිරියයි . සමහර අයට මේ තත්ත්වය තියෙනවා සමහර අයට මේ තත්ත්වය නෑ. එතකොට ඔබ ගැටළුවකට මුහුණ දෙනවා අනේ මට වමනෙ යන්නෙ නැහැ කියලා. මට හොදට කන්න බොන්න පුළුවන්. ඒ නිසා මගේ කුස තුළ වැඩෙන දරැවා නිරෝගී නැත්ද හිතෙනව. අපි ඔබට බොහොම ආදරෙන් කියනවා හැම අම්මා කෙනෙකුටම එක වගේ නෑ. සමහර අම්මලට මුල් මාස තුනේ වමනය යනවා කන්න බෑ. සමහර අම්මලට හොදට කන්න පුළුවන් වමනෙ යන්නෙ නෑ. සමහර අම්මලට මේ මාස තුන විතරක් නෙවෙයි ගර්භණී සමය පුරාම මේ වමනය යෑම කෑම අරැචිය වගේ තත්ත්වයන් තියෙනවා.
සමහර අයට තියෙන තවත් ගැටළුවක් තමයි මම වැඩට ගියාට කමක් නැද්ද? මං බස් එකේ ගියාට කමක් නැද්ද ? මම මහන්සි වෙලා වැඩක් කලාට කමක් නැද්ද? මම ඇවිද්දට කමක් නැද්ද? ඔය වගේ කාරණා. ඔබ හොදට මතක තියා ගන්න ඔබේ දරැවා මෙලොවට බිහිවන තුරැ වැඩෙන්නෙ මව් කුස තුළ පුංචි වතුර බෑග් එකක් ඇතුලේ . පුංචි දරැවා ඒ තුල ආරක්ෂිතයි. අධික වෙහෙස ගෙනදෙන කටයුක්තක් හැර ඔබට වෙන සාමාන්‍යය කටයුතුවල නිරතවෙන්න පුළුවන්. සාමාන්‍යයෙන් මීට පෙර කරා වගේ බස් එකක බයිසිකලයක යන්න පුළුවන්, ඇවිදින්න පුළුවන්, සාමාන්‍යය ගමන් බිමන් යන්න පුළුවන්. හැබැයි දුර ගමන් බිමන් ගොඩක් ගැස්සෙන ගමන් බිමන් අනුමත කරන්නෙ නෑ. ගර්භණී සමයේදි දරැවා කුස තුල වැඩෙන කාලයේදි අම්මාට මනා විවේකයක් පෝෂණයක් අවශ්‍යය නිසා අධික වෙහෙස කියන දේ අප අනුමත කරන්නෙ නැහැ.
ඊලගට අම්මලා අහන තවත් ප්‍රෂ්නයක් තමයි “මට බබා හම්බෙන්න කියලා දැන ගත්තාම මුල් මාස තුනේ මම මහගෙදර ගිහින් නතර වෙන්න ඕනි කියලා මට වැඩිහිටියො කියනවා. ” එයාලා හැමවෙලේම කියන්නෙ ඔයා පරිස්සම් වෙන්න ඕනි කියලනෙ. ඔබ ස්වාමිපුරුෂයාගෙ ගෙදරදි පරිස්සම් නෑ කියල හිතන එක කාරණයක් තියෙනවා. එයාල හිතනවා ඔබ දෙපල ලිංගික ක්‍රියාකාරකම්වල යෙදෙයි. එතකොට දරැවට හානියක් වෙයි කියලා. ගොඩක් දෙනෙක්ට තියෙන ප්‍රෂ්නයක් තමයි ලිංගිකව එකතු වීම කමක් නැද්ද යන්නයි. මතක තියා ගන්න ගර්භණී සමයේදි මුල් මාස තුනේදී හෝ අවසාන මාස තුනේදී හෝ ගර්භණී සමය පුරාම හෝ අම්මා කෙනෙක්ට තාත්තා කෙනෙක්ට තමන්ගේ ලිංගික ක්‍රියාකාරකම්වල යෙදෙන්න අවසර තියෙනවා.
එහෙම අවසර නැති එක් අවස්ථාවක් තියෙනවා. ඒ තමයි මාස තුනෙන් පස්සෙ වෛදයවරයා Scan පරික්ෂාවෙන් පසුව කියනවා ඔබට ලිංගිකව එකතු වෙන්න එපා කියලා. මේ එකතුවීම මත රැධිරවහනයක් වෙන්න පුළුවන් කියලා වෛදයවරයා නිර්දේශ කලහොත් පමණක් මෙම ලිංගිකව එකතුවීම නොකල යුතු. එහෙම නැති ඕනිම වෙලාවක ගර්භණී සමය පුරාම ලිංගිකව එකතු විමට අවසර තියෙනවා. ඒ තුලින් ඔබට විශාල වාසි අත්කර ගත හැකිය. අම්මා අකමැති නම් අම්මට මේ තත්ත්වය ඔරොත්තු දෙන්නෙ නැත්නම් ඇය ශාරීරික අපහසුතාවයෙන් ඉන්නවා නම් අවබෝධයෙන් දෙන්නා මේ කටයුතු වලින් වෙන් වෙලා ආදරයෙන් ඉන්න .
ඔබට විශේෂයෙන්ම කියන්න ඕනි දේ තමයි දරැ ගැබ ආරක්ශා කරන්න ඔබ විශේෂයෙන්ම සතුටින් ආරාක්ෂාකාරි විදිහට ඉන්න ඕනි. හැබැයි අසාමාන්‍ය විදිහට පරිස්සම් වෙන්න, අසාමාන්‍ය විදිහට ගර්භණීභාවය පිළිබදව හිතන්නට ගියහොත් මේක අසනීපයක් බවට ඔබේ හිතේ නිකන්ම පැලපදියම් වෙනවා. ගර්භණීභාවය කියන්නෙ ලෙඩක් නෙවෙයි. මේක හරිම සුන්දර අපූරැ අත්දැකීමක්. මේ අත්දැකීම සුව සේ රිසි සේ විද ගන්න අපි ඔබට ආශිර්වාද කරනවා.
